ខេត្តសៀមរាប៖ មនុស្សប្រុសស្រី ចំនួន០៤នាក់នៅរសៀលថ្ងៃទី២៩ ខែមេសា.ឆ្នាំ២០២៦នេះ ត្រូវបានសមត្ថកិច្ចចាប់ខ្លួន ខណ:ពួកគេព្យាយាមរារាំង ការចុះអនុវត្តសាលដីការបស់តុលាការកំពូលដោយបង្ខំ លើដីទំនាស់មួយកន្លែង ស្ថិតនៅចំណុចផ្សារសំរោង ភូមិសំរោងជើង ឃុំសំរោង ស្រុកសូទ្រនិគម ខេត្តសៀមរាប ដែលដឹកនាំអនុវត្តដោយលោក ឡុង សារ៉ាត់ អាជ្ញាសាលា នៃសាលាដំបូងខេត្តសៀមរាប។
ប៉ុន្តែនៅជិត១ម៉ោងក្រោយពីការចាប់ខ្លួនអ្នកទាំង៤ មន្ត្រី និងសមត្ថកិច្ច បានអនុវត្តដោយជោគជ័យ និងបានប្រគល់ដីអោយទៅភាគីម្ខាងគ្រប់គ្រងកាន់កាប់តាមអំណាចសាលដីកា របស់តុលាការកំពូល។ 
ក្នុងពេលចុះអនុវត្តសាលដីកា គេឃើញក្រុមសមត្ថកិច្ច ដែលមានប៉ូលិស និងប៉េអឹម រាប់សិបនាក់ បានដាក់ពង្រាយពាសពេញទីតាំងអនុវត្ត បំណងការពារសុវត្ថិភាពដល់មន្ត្រីចុះអនុវត្តសាលដីកា។
មុនពេលចូលទៅអនុវត្ត លោកស្រី សោរ ប៊ុនណារីម្ចាស់បំណុលបានអះអាងថា ខ្លួនទទួលបានសាលដីកា របស់តុលាការកំពូលរយៈពេល ១២ ឆ្នាំហើយ នៅមិនទាន់ទទួលបាន យុត្តិធម៌ពិតប្រាកដ។
លោកស្រី សោរ ប៊ុនណារី បានលើកឡើងថាខ្លួនជាកូនបង្កើតរបស់ លោកឪពុកឈ្មោះ ចៅ យ៊ាំង និងអ្នកម្ដាយ យិត ឡាង បានឈ្នះក្ដីពីសាលាដំបូងរហូតដល់តុលាការកំពូល អស់រយ:ពេល ១២ឆ្នាំហើយ តែមិនបានទទួលដី និងផ្ទះ ដើម្បីកាន់កាប់តាមអំណាចរបស់តុលាការកំពូលឡើយ ដោយសារតែ
កូនបំណុលឈ្មោះ សុច ច្រឹង និងប្រពន្ធឈ្មោះ ចៅ យុគចាន់ រារាំង លោភលន់ចង់បានដីផ្ទះកេរឪពុកម្ដាយរបស់ខ្លួនជាម្ចាស់បំណុល ទោះជាចាញ់ក្ដីនៅតុលាការគ្រប់ថ្នាក់ និងមានការសម្របសម្រួល ពីអយ្យការអមសាលាដំបូងខេត្តសៀមរាប អង្គភាពអាជ្ញាសាលា រដ្ឋបាលសាលាខេត្ត គណៈកម្មការដោះស្រាយវិវាទក្រៅប្រព័ន្ធតុលាការ (អ ដ ក) និងក្រសួងយុត្តិធម៌ ជាច្រើនលើក ច្រើនសារក៏ដោយ។
ក្នុងពេលអាជ្ញាសាលាអានសាលដីកា (មុនពេលចាប់ខ្លួន)គេឃើញភាគីសហកូនបំណុលឈ្មោះ សុច ច្រឹង និងប្រពន្ធឈ្មោះ ចៅ យុកចាន់ បានលើកឡើងថា ដីនេះយាយនិងតាបានប្រគល់អោយពួកគាត់ មុនពេលយាយតាស្លាប់ទៅ ហើយពួកគាត់បានរស់នៅលើដីទំនាស់នេះជិត៣០ឆ្នាំមកហើយ។ ប៉ុន្តែនៅកំឡុងឆ្នាំ២០១៤ លោក យិត ខាវ និងប្រពន្ធឈ្មោះ សោរ ប៊ុនណារី បានប្តឹងទាមទារ ហើយតុលាការសម្រេចអោយពួកគាត់ចាញ់ក្តីទើបមានការប្តឹងតវ៉ារហូតមក។ អីចឹងនៅពេលនេះបើអាជ្ញាសាលាសម្រេចអោយគ្រួសារគាត់ចាកចេញពីផ្ទះហើយប្រគល់ដីនិងផ្ទះអោយទៅភាគីម្ខាងគឺពិតជាអយុត្តិធម៍សម្រាប់គ្រួសារគាត់ណាស់។
ក្រោយបញ្ចប់ការអនុវត្តសាលដីការបស់តុលាការកំពូល សាលាដំបូងខេត្តសៀមរាបក៍បានចេញសេចក្តីប្រកាសព័ត៌មានភ្លាមៗផងដែរ។ ខ្លឹមសារសេចក្តីប្រកាសព័ត៌មានបញ្ជាក់ថា កូនបំណុលបានចាញ់ក្តីម្ចាស់បំណុលនៃការអនុវត្តគ្រប់សាលាជម្រះក្តី រាប់ពីសាលាដំបូង សាលាឧទ្ធរណ៍ និងតុលាការកំពូល។ ដូច្នេះសាលាដំបូងខេត្តសៀមរាប សូមធ្វើការបដិសេធរាល់រូបភាព ឬវីដេអូដែលបានផ្សព្វផ្សាយ អមដោយអត្ថាធិប្បាយក្នុងន័យទម្លាក់កំហុសមកលើមន្ត្រីអនុវត្តច្បាប់៕KD